मटा ऑनलाइन वृत्त । जम्मू
मैत्रीची भाषा करणा-या पाकिस्तानने सोमवारी रात्री उशिरा नियंत्रण रेषेजवळ पुँछ भागात भारताच्या हद्दीत घुसखोरी केली. घुसखोर पाकिस्तानी सैनिकांनी भारतीय लष्कराच्या 'सरला' चौकीवर हल्ला केला. या हल्ल्यात २१-बिहार रेजिमेंटचे पाच सैनिक शहीद झाले. (
व्हिडिओ)
जम्मू-काश्मीरचे मुख्यमंत्री आणि युनिफाइड कमांडचे प्रमुख ओमर अब्दुल्ला यांनी हल्ल्याच्या वृत्ताला दुजोरा दिला. शहीद सैनिकांना श्रद्धांजली वाहून ओमर अब्दुल्ला यांनी पाकच्या कृतीचा जाहीर निषेध केला आहे. पाकच्या कृतीमुळे पुन्हा एकदा तणाव निर्माण झाल्याचे ओमर अब्दुल्ला म्हणाले.
लष्करप्रमुख जनरल विक्रमसिंह यांनी हल्ल्याची गंभीर दखल घेतली आहे. हल्ल्यासंदर्भातली सर्व माहिती त्यांनी मागवली आहे.
याआधी जुलै महिन्यात पाकिस्तानी सैन्याने चार-पाच वेळा लांब पल्ल्याच्या बंदुका, आरपीजी आणि हेवी मशीनगन वापरुन भारतीय चौक्यांवर हल्ला केला होता. या हल्ल्यांमध्ये काही भारतीय जवान जखमी झाले होते. पाक सैन्याने सांबा जिल्ह्यातील भारतीय चौकीवर केलेल्या हल्ल्यात सीमा सुरक्षा दलाचा हेड कॉन्स्टेबल राम निवास मीना जखमी झाला होता.
भारत-पाक चर्चेवर परिणाम होणार?
ऑगस्ट महिन्याच्या शेवटच्या आठवड्यात भारत-पाक दरम्यान चर्चा होणार आहे. सप्टेंबर महिन्यात पंतप्रधान डॉ. मनमोहन सिंह संयुक्त राष्ट्रसंघाच्या परिषदेला जाणार आहेत. या परिषदेदरम्यान ते पाकचे पंतप्रधान नवाझ शरिफ यांना भेटणार आहेत. या नियोजीत बैठकांवर पाकिस्तानी हल्ल्यामुळे परिणाम होण्याची दाट शक्यता आहे.
