ಸತ್ತಳೆಂದುಕೊಂಡ ಪತ್ನಿ ಪ್ರಿಯಕರನೊಂದಿಗಿದ್ದಳು

ಚೆನ್ನೈ: ಒಮ್ಮೊಮ್ಮೆ ಪೊಲೀಸರ ತರ್ಕಗಳು ಎಂತಹಾ ಎಡವಟ್ಟಿಗೆ ಎಡೆಮಾಡಿಕೊಡಬಹುದೆಂಬುದಕ್ಕೆ ತಮಿಳುನಾಡಿದಲ್ಲಿ ನಡೆದ ಒಂದು ಘಟನೆ ಸಾಕ್ಷಿ ಹೇಳುತ್ತಿದೆ.

ಪತ್ನಿ ಕಳೆದುಹೋಗಿದ್ದಾಳೆಂದು ಪೊಲೀಸರಿಗೆ ದೂರು ನೀಡಿದ್ದ ವ್ಯಕ್ತಿಗೆ ಅಪರಿಚಿತ ಶವ ತೋರಿಸಿ 'ನಿನ್ನ ಹೆಂಡತಿ ಕೊಲೆಯಾಗಿದ್ದಾಳೆ' ಎಂದು ತಪ್ಪು ಮಾಹಿತಿ ನೀಡಿದ ಪೊಲೀಸರೀಗ ಪೇಚಿಗೆ ಸಿಲುಕಿಕೊಂಡಿದ್ದಾರೆ.

ಸತ್ತಳೆಂದೇ ತಿಳಿದುಕೊಂಡಿದ್ದ ಪತ್ನಿ 'ಬಾಯ್‌ಫ್ರೆಂಡ್' ಜತೆ ಇದ್ದಳು. ಆಕೆ ಕರೆ ಮಾಡಿ ತಾನು ಸತ್ತಿಲ್ಲವೆಂದು ಖಚಿತಪಡಿಸದಿದ್ದರೆ ಶವ ಸಂಸ್ಕಾರ ನೆರವೇರಿಬಿಡುತ್ತಿತ್ತು.

ವೆಲ್ಲೂರಿನ ಕಾವೇರಿಪಕ್ಕಂ ನಗರದ ಗಂಗಾದೇವಿ ಶರವಣನ್ ದಂಪತಿ ಕತೆ ಇದು. ಜುಲೈ 13ರಿಂದ ಗಂಗಾ ದೇವಿ ನಾಪತ್ತೆಯಾಗಿದ್ದಳು. ಸಾಫ್ಟ್‌ವೇರ್ ಇಂಜಿನಿಯರ್ ಆಗಿದ್ದ ಶರವಣನ್ ಪತ್ನಿ ನಾಪತ್ತೆಯಾಗಿರುವುದಾಗಿ ಪೊಲೀಸ್‌ಠಾಣೆಗೆ ದೂರು ನೀಡಿದ್ದ. ಕಳೆದ ಬುಧವಾರ ಅವರು ಗೋಣಿ ಚೀಲದಲ್ಲಿ ಕೊಳೆತುಹೋಗಿದ್ದ ಮಹಿಳೆಯ ಶವ ತೋರಿಸಿ ''ನೀವು ಹೇಳಿದ ಎಲ್ಲಾ ಚಹರೆಗಳು ಈ ಮೃತ ದೇಹಕ್ಕಿದೆ. ನಿಮ್ಮ ಪತ್ನಿ ಕೊಲೆಯಾಗಿರಬಹುದು,'' ಎಂದು ನಂಬಿಸಲು ಪ್ರಯತ್ನಿಸಿದ್ದರು.

ಶವ ಮುಕ್ಕಾಲು ಭಾಗ ಕೊಳೆತುಹೋಗಿದ್ದರಿಂದ ಗುರುತು ಪತ್ತೆಹಚ್ಚಲು ಸಾಧ್ಯವಾಗುತ್ತಿರಲಿಲ್ಲ. ಶರವಣನ್ ಪ್ರಾರಂಭದಲ್ಲಿ ಶವ ತನ್ನ ಪತ್ನಿಯದೆಂದು ಒಪ್ಪಿಕೊಳ್ಳಲು ತಯಾರಿರಲಿಲ್ಲ. ಆದರೂ, ಕುಟುಂಬದವರ ಒತ್ತಾಯದ ಮೇರೆಗೆ ಅನಿವಾರ್ಯವಾಗಿ ಒಪ್ಪಿಕೊಳ್ಳಬೇಕಾಯಿತು.

ಶಿಷ್ಟಾಚಾರದಂತೆ ಕುಟುಂಬದವರು ಪೊಲೀಸರಿಗೆ ಅರ್ಜಿ ಸಲ್ಲಿಸಿ ಮೃತದೇಹವನ್ನು ತಮಗೊಪ್ಪಿಸುವಂತೆ ಕೇಳಿದ್ದರು. ಅಷ್ಟರಲ್ಲೇ ಬಂತು ನೋಡಿ ದೂರವಾಣಿ ಕರೆ. ಸತ್ತಳೆಂದು ಬಗೆದಿದ್ದ ಗಂಗಾದೇವಿ ತನ್ನ ಸಹೋದರ ಸುಕುಮಾರನ್‌ಗೆ ಕರೆ ಮಾಡಿ ತಾನು ಸತ್ತಿಲ್ಲ ಕೊಯಮತ್ತೂರಿನಲ್ಲಿದ್ದೇನೆಂದು ಹೇಳಿದಳು. ಅಬ್ಬಾ ಗಂಗಾ ಬದುಕಿದ್ದಾಳಲ್ಲಾ ಎಂದು ಕುಟುಂಬದವರು ಖುಷಿಪಡುವಾಗಲೇ 'ಕತೆಗೆ ಹೊಸ ತಿರುವು' ಸಿಕ್ಕಿದೆ.

ಗಂಗಾ ಮದುವೆಯಾಗುವ ಮುನ್ನ ಕಾರ್ತಿಕ್ ಎಂಬುವನನ್ನು ಪ್ರೇಮಿಸುತ್ತಿದ್ದಳು. ಶರವಣನ್ ಕಣ್ಣುತಪ್ಪಿಸಿ ಆತನೊಂದಿಗೆ ಕೊಯಮತ್ತೂರಿಗೆ ಹೋಗಿದ್ದ ಆಕೆ, ತಾನು ಸತ್ತಿದ್ದೇನೆಂದು ಪತ್ರಿಕೆಗಳು ಪ್ರಕಟಿಸಿದ ವರದಿ ನೋಡಿ ಗಾಬರಿಯಾಗಿ ಸಹೋದರನಿಗೆ ಕರೆ ಮಾಡಿ ತಾನಿನ್ನೂ ಬದುಕಿರುವುದಾಗಿ ಖಚಿತಪಡಿಸಿದಳು.

ಕಾರ್ತಿಕ್‌ನೊಂದಿಗೆ ಕೊಯಮತ್ತೂರಿನಲ್ಲಿ ಕಳೆದ ಗಂಗಾ ತನ್ನ ಕೈಲಿದ್ದ ಹಣವನ್ನೆಲ್ಲಾ ಖರ್ಚು ಮಾಡಿಕೊಂಡಿದ್ದಳು. ವಾಪಸ್ ಮನೆಗೆ ಹೋದರೆ ತಾನು ಪ್ರಿಯಕರನೊಂದಿಗಿದ್ದ ವಿಷಯ ಬಯಲಾಗುತ್ತದೆಂಬ ಭಯದಿಂದ ಸಂಬಂಧಿಕರಿಗೆ ಕರೆ ಮಾಡಿರಲಿಲ್ಲ. ಐದು ದಿನ ಕಳೆಯುವಷ್ಟರಲ್ಲಿ ಪ್ರೇಮಿಗಳ ಕೈ ಬರಿದಾಗಿದ್ದರಿಂದ ಪ್ರಿಯಕರ ಸಿಕ್ಕ ಸಿಕ್ಕ ಕೆಲಸ ಮಾಡಿ ಹಣ ಸಂಪಾದಿಸುತ್ತಿದ್ದ ಎಂದು ಪೊಲೀಸರು ಹೇಳಿದ್ದಾರೆ. ಕೊನೆಗೂ ಆಕೆ ವಾಪಸ್ ಕಾವೇರಿಪಕ್ಕಂಗೆ ಮರಳಿದ್ದಾಳೆ.