Vikipedio.net
Se vi serĉas la Vikipedion en Esperanto, klaku ĉi tien...
Ekde 2012 kreiĝas ankaŭ oficiala uzanto-grupo ELiSo – Esperanto kaj Libera Scio – ligita al la Vikimedia Fondaĵo.
Aktuale: Metiejo pri WikiTrans
okazos 2013-05-01/05 en Partizánske (Slovakio)
La programo WikiTrans senkoste evoluigata de Eckhard Bick scias traduki el la angla lingvo en Esperanton ĉiujn 4.182.609 artikolojn de la angla Vikipedio. Ili tamen ne povas aŭtomate fariĝi parto de la Esperanta Vikipedio, ĉar necesas poluri ilin lingve kaj teknike. Provlegado de maŝintradukitaj artikoloj povas multe plirapidigi la kreskon de la grando kaj kvalito de Vikipedio en Esperanto, kompare al verkado de novaj.
Tial E@I kaj GrammarSoft serĉas pionirojn pretajn antaŭenigi la ideon – personojn kun sperto pri Vikipedio kaj/aŭ tradukado. De la 1-a ĝis la 5-a de majo okazos en Partizánske (Slovakio) metiejo, kiu praktike instruos kiel kontribui al Vikipedio helpe de WikiTrans. Flanke okazos ankaŭ organiza kaj teknika diskutoj. Partopreno, loĝado kaj matenmanĝoj estos senpagaj, eble pli depende de ricevo de subvencio. Aliĝu retpoŝte ĉe info ĉe ikso punkto net kaj vizitu paĝon de la novnaskita Projekto:WikiTrans.
Listo de projektoj de E@I rilataj al la Vikipedio
- 2012: Dum festa renkontiĝo okaze de la Zamenhofa tago la 15-an de decembro 2012 en la Pola instituto de Vieno, Marek Blahuš sekvata de Miroslav Malovec prelegis pri la temo "Kiel ni informas pri niaj gravuloj: Esperantistoj en la Vikipedio, kun ekzemplo de Josef Cink".
- 2012: Kadre de la konferenco KAEST 2012 organizita de E@I en Modra-Harmónia (Slovakio) okazis la 15-an kaj la 16-an de novembro vikipedia trejnado, aranĝita kunlabore kun Vikimedio Slovakio kaj subvenciita de la Vikimedia Fondaĵo. La grupon de komencantoj trejnis Michal Matúšov kaj Miroslav Hruška, la grupon de progresintoj instruis Marek Blahuš.
- 2012: Kelkajn tagojn antaŭ KAEST 2012 pretiĝis la DVD "Vikipedio en Esperanto – eksterreta eldono 2012", kiu enhavas aktualan staton de la Vikipedio en Esperanto de oktobro 2012 (pli ol 170.000 artikoloj). Unuafoje pro tio Esperanta vikipedio ekuzebliĝis per la programo Kiwix.
- 2012: Dum la Tutslovakia Esperanto-Renkontiĝo la 14-an de aprilo 2012 en Trnava prezentis Marek Blahuš rezultojn de sia esporo pri populareco de la vikipediaj artikoloj pri Esperanto kaj Zamenhof kaj atentigis pri la eblo uzi Vikipedion kiel mezurilon de sukceso de gazetaraj kampanjoj.
- 2011: La jarkonferencon de Wikimedia Nederland en Utrecht la 5-an de novembro partoprenis E@I-estrarano Marek Blahuš. Krome ĉeestis esperantisto Ziko van Dijk, prezidanto de Wikimedia Nederland.
- 2011: La unua Esperanta Vikimanio, unika internacia renkontiĝo de esperantistaj vikipediistoj kaj interesiĝantoj pri Vikipedio, okazis de la 26-a ĝis la 30-a de oktobro en Svitavy (Ĉeĥio), organizata de Pavla Dvořáková kaj E@I, omaĝe al dekjara jubileo de la Vikipedio en Esperanto.
- 2011: La konferencon Wikimania 2011 okazintan de la 4-a ĝis la 7-a de aŭgusto en Haifa (Israelo) partoprenis la E@I-estrarano Marek Blahuš, danke al stipendio atribuita al li de la organizanto Wikimedia Foundation. Entute ĉeestis 7 esperantistoj, inter 720 partoprenantoj entute.
- 2011: Kiel staĝanto de E@I en Francio, Marek Blahuš publike prelegis en Strasburgo okaze de la 10-jariĝo de Vikipedio, kadre de la Semajno de Esperanto 2011. La esperantlingvan prelegon kun titolo "Vikipedio: 10 jaroj, kaj poste?", okazintan en la interpretista lernejo ITI-RI, samtempe interpretis en la francan lingvon Cyrille Hurstel.
- 2010: Kadre de la konferenco KAEST 2010 organizita de E@I en Modra-Harmónia (Slovakio) okazis la 19-an de novembro 3,5-hora vikipedia trejnado. Lektoris Pavla Dvořáková kaj Marek Blahuš.
- 2010: En la Vikipedia konkurso "Monato de Vikipedio", organizata kaj sponsorata de E@I, dum aprilo partoprenis 28 konkursantoj, kiuj plibonigis kelkajn el la 1000 plej gravaj artikoloj tiom, ke la Vikipedio en Esperanto gajnis la 1-an lokon inter ĉiuj lingvaj versioj laŭ kresko de tiuj artikoloj dum tiu monato.
- 2008: Dum KAEST 2008 en Dobřichovice (Ĉeĥio) okazis vikipedia trejnseminario por pli ol dudek partoprenantoj el pluraj landoj. Lektoris Yves Nevelsteen, Pavla Dvořáková kaj Miroslav Malovec.
- 2008: Eldonon de informilo pri Vikipedio, presita kaj distribuita al 1800 partoprenantoj de la 93-a Universala Kongreso de Esperanto en Roterdamo kunfinancis E@I kaj en ĝia kreado partoprenis E@I-aktivuloj.
- 2008: Dum la 93-a Universala Kongreso de Esperanto en Roterdamo okazis pluraj prelegoj pri Vikipedio, kadre de programo kunordigata de Yves Nevelsteen, Beatrice Allée kaj Ziko van Dijk, aranĝita ankaŭ de E@I.
- 2008: Vikipedio por vi estas libro de Ziko van Dijk, vikipediisto kaj historiisto, produktita per E@I kaj eldonita en la eldonejo Espero en 1000 ekzempleroj.
- 2008: De la 4-a ĝis la 6-a de aprilo kadre de la aranĝo Sabla Printempo en Písek (Ĉeĥio) okazis tutsemajnfina trejnado pri kontribuado al Vikipedio kun 20 partoprenantoj, organizata per kunlaboro de ĈEA, ĈEJ kaj E@I. Lektoris Miroslav Malovec, Yves Nevelsteen, Pavla Dvořáková, Marek Blahuš kaj Jan Urbánek.
- 2007: Vikipedio – praktika manlibro estas libro de Yves Nevelsteen, vikipediisto kaj estrarano de E@I, produktita per E@I kaj eldonita en la eldonejo Espero.
- 2007: En majo vikipediistoj gvidataj de Yves Nevelsteen trejnis novulojn dum la 100-jariĝa aranĝo de la esperanto-grupo La Verda Stelo en Antverpeno (Belgio).
- 2007: Teamo de vikipediaj asistantoj starigita de Yves Nevelsteen ekproponis senpage siajn servojn al vikipediaj novuloj kaj personoj kiuj posedas materialon enmeteblan en la Vikipedion sen ne scias tion mem fari.
- 2007: En Partizánske (Slovakio) de la 23-a ĝis la 25-a de februaro okazis semajnfina seminario "Kiel verki por Vikipedio", organizita de Slovakia Esperanta Junularo kaj E@I-aktivuloj.
- 2006: En la DVD Esperanto Elektronike eldonita de E@I aperis plena eksterrete konsultebla versio de la Vikipedio en Esperanto, laŭ stato de la 30-a de junio 2006 kun preskaŭ 50 000 artikoloj, aranĝita de Marek Blahuš.
Tiu ĉi listo ne pretendas esti kompleta, ĉar precipe unu- aŭ kelktagaj vikipediaj trejnadoj estas jam organizitaj de E@I-aktivuloj dum multaj esperanto-aranĝoj (listo de kelkaj pliaj tiaj troviĝas en malnova vikia paĝo).
Vidu ankaŭ: Historio de la Vikipedio en Esperanto
Por pli da informoj pri E@I, vizitu la retpaĝaron de E@I aŭ legu la artikolon E@I en la Vikipedio.