चंद्रातुनी तुझ्या या बरसात चांदण्याची
लाजू नकोस राणी दे साथ जीवनाची
दे साथ जीवनाची !
बिलगून आज बोले ही प्रीत साजणाची
आले नवी वधू मी ही रात मीलनाची
ही रात मीलनाची !
हा कुंभ चंद्रिकेचा ओतीत शुभ्र धारा
उबदार गारव्याचा अंगावरी शहारा
आली जणु कळी ही उमलून यौवनाची
दे साथ जीवनाची !
माझ्या पुढे उभी तू लेऊन रूप साज
का हासते कळेना डोळ्यामधील लाज
समजूत काढ्वेना या बाव-या मनाची
ही रात मीलनाची !
हाती तुझ्याच हात, हा स्पर्श अमृताचा
घुमतो मनात सूर संसार संगीताचा
गाऊ मिळून नांदी भावी सुखी क्षणांची
दे साथ जीवनाची !
गीत
-
जगदीश खेबूडकर
संगीत
-
बाळ पळसुले
स्वर
-
आशा भोसले,
सुधीर फडके
चित्रपट
-
सुधारलेल्या बायका (१९६५)